tariq-hasimi-li-diji-talebani-ye

Cîgirê Serokomarê Iraqa Federal Tariq El Haşimî, di daxuyaniyeke xwe de ragihand ku ew li dijî hilbijartina kurdekî ye, ku bibe serokomarê Iraqê. Tariq El Haşimî ku endamê Lîsta El Irqiye ye, ku serokê wê Eyad Elawî ye. Tariq El Haşimî li dijî berendamiya (berbijêrî) Celal Talebanî derket.

Tariq El Haşimî, ku niha cîgirê Serokomarê Iraqê ye, di daxuyaniyeke xwe de ragihand ku Iraq welatekî ereban e û ji ber vê jî, divê kesekî ereb serokatiya komarê bike.

Li gor nûçeya Zagros Tv, roja 8'ê adarê cîgirê Serokomarê Iraqê Tariq El Haşimî, di daxuyaniyeke xwe de da xuyakirin ku erka Serokomariyê bilindtirîn erk e, ji ber ku Iraq jî dewleteke ereban e, divê kesekî ereb serokatiya komarê bike.

Di berdewama daxuyaniya Tariq El Haşimî de, derket holê ku bingeha van gotinên radîqal û hişk ji bo çi ye. Haşimî da xuyakirin ku wekî berendamekî ereb, ew bixwe ji bo Serokomariya Iraqê berendam e.

Tariq El Haşimî, di dûmahîka daxuyaniya xwe de behsa têkiliyên Iraqê bi dewletên din ên ereb re kir û got heke Serokomarê Iraqê ereb be, dê Iraq vegere hembêza niştimana erebî û pêwendiyên Iraqê dê bi dewletên ereb ber bi başbûnê ve biçe.

Li aliyê din lîsta dewleta qanûnê bi Serokatiya Nûrî El Malikî ragihand, ku dê piştevaniya berendamiya Celal Talebanî ya ji bo Serokomariya Iraqê bike. Li ser vê mijarê Serokomarê Iraqê Celal Talebanî jî ragihand ku 4 lîste yên sereke razîbûna xwe ji bo Serokomariya wî ya Iraqê nîşan dane.

Li gor yasayên Iraqê, dewleta Iraqê ji 2 neteweyên sereke pêk tê û pêdiviyên hikûmeta Iraqê bi hevbeşî bi rê ve diçe.