Li gor agahiyan, saet di 04:32'ê sibehê de li Elezîzê di asta 6.0 de erdej pêk hat. Erdhej li Elezîz û bajarên dora wê hate hîskirin, li Bîngolê bû sedema birîndariyan. Hate ragihandin ku li Elezîzê heta niha 41 mirin hatine tesbîtkirin.

Li gor nûçeyên ajansan hîn di bin xerabeyan de 8 kes hene, ku divê bên rizgarkirin û xebata rizgariyê berdewam e.

Enstîtuya Lêkolînên Erdhejê û Rasatxaneya Qendîlî ya Zanîngeha Bogazîçî ragihandin ku bingeha erdhejê li navçeya Qaraqoçan a Elezîzê ye û navenda wê nehiyeya Başyurt e. Li gor dezgeyan asta erdhejê 6.0 bûye. Her wisa hate ragihandin ku erdhej 5 kîlometroyan li binê erdê pêk hatiye û nêzî 1 xulekê (deqîqe) domiyaye.

Erdhej li bajarên derdorê wekî Meletî, Semsûr, Amed, Dêrsim, Bîngol, Erzincan, Erzerom û Êlihê jî hatiye hîskirin.