kazim-yilmaz-koca-xwe-ya-dawi-kir

Berî niha bi 30 salî, dema ku dest bi Têkoşîna Azadiya Kurdistanê kirin, hemû 30 salî bûn. Di 30 salî de her cure kuştin jî dîtin, mirin jî dîtin. Lê nemirin, ji xwe re mirin nehiştin, jiyaneke bêsînor û bêdawî ava kirin, bûn nemir. Yên ku mirin, ew ên ku dest ji Têkoşîna Azadiya Kurdistanê berdan û dest bi tesfiye û tunekirina tevgerê kirin bûn.

Kazim Yilmaz ê ku endamê PKK bû, piştî 30 salên têkoşer, hîn ku mal bi mal digeriya û gel ji bo protestokirina serdegirtina Roj Tv vedixwend çalakiyan, krîza dil derbas kir û di siwareyê de koça dawî kir.

Kazim Yilmaz do êvarê saet di 17:00'an de, krîza dil derbas kir. Li gor agahiyên ku hevalên wî dane, Yilmaz ji bo kurdan vexwîne çalakiya protestoyê, mal bi mal digeriya. Li deriyê malên kurdan dixist û ew vedixwendin çalakiyê. Ji bo beşdariya meşa li Brukselê gazî wan dikir. Heyecana pêvajoyê, planên NATO, DYA, Ewropa û Tirkiyeyê serê wî mijûl dikir û stresek giran dixist ser laşê wî. Dilê wî hew îdare kir û krîza dil derbas kir.

Koça dawî ya Kazim Yilmaz kurd xemgîn kirin. Ji bo Yilmaz roja 7'ê adarê li Parîsê dê kurd li komeleya xwe bicivin, saet di 13:00'an de civîna bîranînê dê were pêkanîn û sersaxî bên qebûlkirin. Cenazeyê wî piştî formalîteyên fermî dê ber bi Sêrtê ve were şandin.

Wî 30 salên tijî çalakî û hewildan di nav refên Têkoşîna Azadiya Kurd de derbas kir. Demekê li nav refên gerîla ma, birîndar bû û hate girtin. Di bin çavan de êşkenceyên giran dît, 9 salan di girtîgehê de raza û derket. Dûmahîka temenê xwe, ji bo tedawiya nexweşiya xwe li Fransa derbas kir. Çar salên dawî ji aliyekî bi tedawiyê, ji aliyekî jî bi hewildanên siyasî derbas kir.

Koça Kazim Yilmaz dide nîşan ku nifşekî din bi têkoşîn, berxwedan, şer û pevçûnan temenek derbas kir. Ferqa vî nifşî ji nifşê Celadet Elî Bedirxan, Cegerxwîn, Qedrîcan, Osman Sebrî û hevalên wan ev e, ku ev nifş dema hate temenê xwe yê 60 salî, li xwe kêm nekir û bi milyonan kes li pey xwe hişt. Heta vî nifşî nifşekî nû di salên 1980'yî de derxist holê, ku ew nifş niha 30 salî ye û li serê çiyê ye, li kolanên bajaran e û li her derê li ser kar e. Lê nifşê Bavik ê Têkoşîna Azadiya Kurdistanê îro gihaşt temenê xwe yê 60 salî.

Amîda Kurd