kck-eserhildana-ranya-bi-bir-ani

Serokê Konseya Kargerî ya KCK'ê Murat Karayilan, bi boneya êrîşên Ewropa yên li ser saziyên kurdan daxuyaniyek da Ajansa Nûçeyan a Firatê. Karayilan 19'mîn salvegera serhildana gelê Ranyayê bi bîr anî û bal kişand ser berxwedana gelê kurd a dîrokî û anî ziman ku dê gelê kurd li hemberî êrîşan bi ruhê dîrokê bersivê bide. Karayilan wiha axivî:

"Rojên 5 û 6'ê adarê ji bo Doza Azadiya Kurdistanê salvegereke girîng in. Di 5'ê adarê de li Ranya berxwedana qehremanî ya gelê me dest pê kiriye û piştre li tevahiya Başûrê Kurdistanê belav bûye, bûye raperîn. Di meşa azadiya kurdan de zîvirokeke girîng e. Salvegera 19'mîn a raperîna 5'ê adarê, di serî de ji bo gelê Kurdistana Başûr, bi giştî ji bo hemû gelê Kurdistanê pîroz be."

Karayilan bal kişand ser girîngiya hilbijartinên 7'ê adarê jî û wiha got:

"Ez hêvî dikim hilbijartinên Iraq û Başûrê Kurdistanê di hewayeke aştî û demokrasiyê de pêk were û gelê me yê Kurdistana Başûr di vê serhildanê de serkeftinê bi dest bixe. Teqez, dê serkeftina gelê me ji bo mayindebûna destkeftiyan roleke girîng bilîze."

Karayilan di axaftina xwe de bal kişand ser êrîşên li ser destkeftiyên gelê kurd û got:

"Îro li dijî destkeftiyên gelê me êrîşeke pir veşartî dest pê kiriye. Bi taybetî çapemenî û weşanên din ên kurdan û hemû aliyên siyasî yên Kurdistanê divê bizanin ku îro êrîşa li hember Kongra Gel û Roj Tv, êrîşeke di asta cîhanî de ye li dijî îtibara gelê kurd. Ev êrîş li hember tevgera çandî, dîplomatîk û siyasî ya ku li hember mêtingeriya zalim bi hêza xwe ya navxweyî li ber xwe dide. Ev êrîş li hemberî gelê kurd hemûyî ye. Ji ber vê, divê hemû sazî û dezgeyên demokratîk ên Kurdistanî li hember van êrîşan bêdeng nemînin. Ev êrîşek li dijî doza azadiyê ya mafdar e. Herkes divê helwesta xwe nîşan bide û dengê xwe bilind bike. Gaziya me ev e. Gelê me, divê di vê dema girîng de têkoşîna xwe bilind bike û doza me ya azadiyê ya mafdar û meşrû li hemû bingehan bi awayekî xurt bimeşîne. Her kesek barê ku dikeve ser pişta xwe divê hilgire."