girtina-seroke-pjak-e-kare-dya-ye

Binçavkirina Hecî Ehmedî piştî girtina Serokê Kongra Gel Remzî Kartal û Zubeyir Aydar pêk hat.

Serokê PJAK a ku li Rojhilata Îranê li dijî rejîma Îranê têkoşînê dide, do êvarî li bajarê Kolnê hate binçavkirin. Polîsan Hecî Ehmedî ji mal birin.

Li gor agahiyan operasyon ji aliyê 12 polîsên sivîl ve pêk hat. Di encama operasyonê de saetê li malê lêgerîn hate kirin. Nîşe nivîsên Hecî Ehmedî û telefona wî hate desteserkirin. Polîsên Almanya der barê sedema girtina wî de jî, der barê cihê ku niha lê ye jî tiştek negot.

Rayedarê Koordînasyona PJAK'ê Agirî Şaho, binçavkirina Hecî Ehmedî şermezar kir û ev yek wekî operasyonên dawî yên der barê siyasetmedarên kurd de, ku ji aliyê navendeke Amerîka ve tên meşandin, bi nav kir.

Şaho ji Ajansa Nûçeyan a Firatê (ANF) re axivî û got: "Li pey vê operasyonê Amerîka heye. Zubeyir Aydar û Remzî Kartal hatin girtin, dibe daxwaza Tirkiyeyê bandor lê kiribe. Lê binçavkirina Hecî Ehmedî dide nîşan ku hêzên din hene. Em difikirin ku tiliya Amerîkayê di vê operasyonê de heye."

Şaho daxuyand ku binçavkirina Hecî Ehmedî wekî desteka sepanên paşverû yên Îranê tên famkirin û got: "Ev demek e ku di navbera Amerîka û Îranê de hevdîtin tên kirin. Tê guhê me ku hin peyman hene. Teqez bazarek tê kirin. Heftiya borî serokê Cundullahê radestî Îranê kirin. Ev jî operasyoneke Amerîkayê bû. Ez bawer dikim ku rêveberiya Washingtonê ji Îranê re dibêje 'binihêre em ê têkoşînekê li dijî hêzên pirsgirêka wan bi te re heye, dikin.' Peyameke wiha dide.